交易長跑 — 第一篇：入坑
當年食完lunch，同同事係Pantry吹水，傾吓傾吓，佢提到佢係做交易嘅。
好奇心作怪，就問咗句「乜嚟㗎？」
佢話，去book個meeting room，我解釋俾你聽。就係咁簡單一句，我地就去book咗個房，關埋門，外面嘅人大概以為我地係度傾緊咩重要嘢，無人打擾。佢開始講，一講就講足成個下晝。就係咁，開始咗呢條長跑。
佢話佢交易緊係CFD，唔係炒股嗰啲。星期一至五開市，差唔多24小時都可以交易。主要係交易外匯，全世界都有好多人參與，唔似股票嗰啲，好易俾少數人控制晒個價，相對公平啲。仲有一樣，可以long（買升）又可以short（沽跌），唔係淨係等個市升先可以賺，相對機會多啲。
聽落真係好簡單：預計升就買入，預計跌就賣出。
我第一個反應係：「咁簡單㗎？」
跟住佢提到槓桿，我即刻有啲卻步。槓桿呢個字，平時聽人講都係負面嘅，好似炒樓用槓桿、孖展炒股輸身家之類，直覺上覺得係危險嘢。
佢解釋：「槓桿喺呢度唔係借錢去輸，係可以俾你用100美金，有10000美金嘅購買力。賺嘅時候係以10000蚊計，輸嘅時候都係以10000蚊計，所以波幅係會放大好多。」
「不過你唔使怕輸身家，broker有個強制平倉機制，你個戶口唔夠錢，佢會自動幫你平倉，最多係輸清你入落嘅100蚊，唔會再多。你諗吓，間broker係外國公司，就算你爆倉，佢總唔成派人嚟香港追你數啩？況且好多人都爆倉，間公司唔掂㗎，所以個系統一定係set到唔會俾你輸過個本。」
我聽完，諗咗一諗，覺得有道理。
佢仲講，做交易唔係亂買賣，要有策略，要back test，要有數據支持，係咁先係交易，唔係咁就係賭錢。佢仲順帶介紹咗幾個指標俾我，RSI、MACD之類，我當時唔係完全明白係點運作，但係睇佢講到頭頭是道，覺得好似好勁咁。
最後佢話，初頭唔使用真錢，可以開個demo account，試吓先，學吓先，冇咩損失。
幾日後，我開咗個demo account，用IC Markets。跟住去博客來買咗幾本中文入門書，英文差，睇英文書太痛苦，買中文版算。
睇完書，覺得掌握咗啲嘢，試吓實戰。
啲入門書教嘅係：黃金交叉買入、死亡交叉賣出、超買賣出、超賣買入、MACD金叉死叉。每一個策略，書裡面都有圖表，有例子，睇落好有說服力。
結果點？大家估到㗎喇，GG。好彩係demo，冇輸真錢。
輸完之後，我有認真質疑過書本嘅內容。
但係諗吓諗吓，又覺得其實係合理嘅。
通常入門書介紹一個策略，都會舉幾個成功嘅例子，有時仲會加幾個失敗例子增加說服力。原意係好嘅，某些市況之下，呢啲策略係真係可以賺到錢。但係問題係，如果新手學完呢啲，以為靠呢幾個pattern就可以持續賺錢，咁係一個好大嘅誤會。
實際上，持續賺錢唔係只靠入場出場嘅策略，仲有好多其他部份，資金管理、心態、市況判斷，但呢啲入門書通常只係輕輕帶過，因為講深咗就唔係入門書喇。
我諗通之後，反而覺得釋懷：如果睇一兩個星期書就可以持續賺錢，世界上仲有人返工做生意？我又唔係咩天才，今次唔成功係正常，唔識就繼續學，繼續試。
Demo account唔使本錢，最大嘅成本係買書嘅錢同睇書嘅時間。即係咁，都唔係完全無收穫，起碼知道咩唔work。知道咩唔work，本身都係一種進步。
記錄呢條路，係我寫嘢嘅原因。
我未成功，仲係搵緊自己嘅路。「點樣贏」我分享唔到，但「咩唔work」我可以話俾你知，希望減少你試錯嘅時間，唔使行多我行過嘅彎路。
條路自己揀，輸左唔好喊。大家一齊跑落去。